DILI, Timor-Leste – Governu Estadus Unidus, reprezenta husi Ajénsia Estadus Unidus ba Dezenvolvimentu Internasionál (USAID), asina revizaun ba ninia Akordu Objetivu Dezenvolvimentu nian (DOAG) ho Governu Timor-Leste iha Tersa, ne’ebé sei aumenta adisional millaun $16.85 husi Estadus Unidus ba dezenvolve Timor-Leste.

“Ho fundu ne’e, Estadus Unidus m9antein ninia komitementu ba haforsa parseria ho Timor-Leste tuir servisu ne’ebé iha ba atinje ninia meta rasik,” hatete Embaixadora Estadus Unidus ba Timor-Leste Kathleen M. Fitzpatrick.   

Ministériu Finansa asina revizaun en nome de Governu Timor-Leste. Ne’e nudar sestu revizaun ba iha DOAG dezde asina iha inísiu tinan 2014 no agora akordu ne’e estende tan to dia 30 de Setembru 2020. Revizaun ne’e presiza bainhira Estadus Unidus fornese fundu adisional ba akordu orijinál. Ho revizaun ne’e, kontribuisaun Estadus Unidus nian ba akordu 2014 liu husi USAID hamutuk millaun $70.88.    

Objetivu husi asisténsia dezenvolvimentu Estadus Unidus nian hodi ajuda Timor-Leste sai nasaun ne’ebé prósperu, saudavel no demokrátiku liu tan. USAID servisu hamutuk ho Timor-Leste ba atinje objetivu ne’e liu husi foka ba kreximentu ekonomia ne’ebé inkluzivu no sustentável; nakloke, transparente no governasaun estadu de direitu demokrátiku no saúde. Espesiálmente, USAID iha programa ba agrikultura, turizmu, bee no saneamentu, governasaun no demokrasia, aduaneira no servisu kuidadu saúde.