Hato’o Ba: Respondente/Parte Sira Hotu Ne’ebé Interese: USAID/Programa Servisu Lokál Timor-Leste dezeña ona atu avansa dezenvolvimentu ida ne’ebé lidera husi ajensia lokál no haforsa ajensia lokál nia abilidade hodi empodera autor lokál sira atu lidera bainhira responde ba dezafiu sira iha dezenvolvimentu (htips://www.usaid.gov/localworks). Ajensia ne’e sei identifika Joven Timor oan nia prioridade sira no suporta joven sira atu lidera moris ne’ebé produtivu iha fatin ne’ebé sira nia lian/hanoin ema seluk sei rona. Programa Servisu Lokál Timor-Leste agora dezeña hela “Listening Tour”ida ne’ebé luan, ida ne’ebé sei inklui diskusaun individuál no foka grupu sira ho joven no entidade importante sira iha Munisípiu 13 iha Timor-Leste. Pedidu Ba Informasaun (PBI) ida ne’e buka atu identifika entidade no individual sira ne’ebé iha kapasidade nesesáriu atu suporta tour-rona ida ne’e.

Kapasidade hirak ne’e inkui:

1. Analiza dadus kualitativu

a. Abilidade atu akapta nota ho detalladu husi diskusaun sira iha Tetun no/ka Inglés.

b. Abilidade atu transkreve, organiza, tau iha kódigu, no analiza nota sira iha Tetun no Inglés.

c. Abilidade atu prodús relatóriu ida iha Tetun no Inglês ho xave temátiku, prioridade no rekomendasaun sira.

d. Abilidade atu fó treinamentu ba ema seluk kona-ba analiza dadus kualitativu.

2. Produsaun ba produtu/materia aprendizajen sira

a. Esperiénsia kona-ba dezenvolve produtu/materia sira husi dadus peskiza kualitativu hodi fahe rejultadu no oportunidade aprende iha maneira ne’ebé atrai ou konvense ema ho diak.

b. Materia sira ne’e bele inklui relatóriu, folla ka surat-tahan faktu, estudu kazu, no vídeo sira.

3. Tradusaun

a. Abilidade atu fornese kualidade tradusaun aas ho verbál no imidiatamente husi kualkér lian/dialetu lokál ruma ba iha Tetun no/ka Inglês.

b. Abilidade atu fornese tradusaun eskrita husi relatóriu sira no materia sira seluk husi kualkér lian/dialetu lokál ruma ba iha Tetun no/ka Inglês.

4. Kordenasaun iha lokál

a. Abilidade atu identifika entidade lokál sira ne’ebé relevante no organiza enkontru sira iha kualkér Munisípiu 13 nia laran iha Timor-Leste. Fatin enkontru sei inklui área sidade no rurál sira.

b. Fó konsellu kona-ba toba fatin no mós kona-ba lojístika viajen sira seluk ba iha kualkér Munisípiu 13 iha Timor-Leste.

Bazeia ba objetivu husi Programa Servisu Lokál, “Entidade Lokál” refere ba entidade lokál sira, inkui mós maibé la limita de’it ba iha individual sira, organizasaun naun-govermentál, instituisaun akadémiku, no setór privadu sira ne’ebé mak:

1. Organizadu ho legál iha lei Timor-Leste nia okos

2. Identifika ona Timor-Leste nu’udar sira nia fatin prinsipál atu halo servisu ka operasaun ba

3. Jere husi korpu jestór ida ne’ebé kompostu husi maioria sidadaun ka ema ho rezidente legál Timor-Leste nian.

Iha parte seluk tan, bazeia ba lejizlasaun Servisu Lokál nian, entidade sira ne’ebé eligível tenke seidauk simu osan liu millaun $5 (USD) husi USAID iha tinan lima kotuk nia laran. Kuiñesementu diak iha lian Tetun mak presiza tebes duni ba servisu ne’ebé sei antisipa. Pedidu ba Konteúdu: Favór fornese informasaun hirak tuir mai másimu iha pájina tolu nia laran, hakerek uja komputadór, ho medida letra (font size) labele ki’ik liu 12:

1. Informasaun Jerál Instituisaun Nian

a. Naran husi organizasaun/individu, enderesu ka hela fatin, no informasaun kontaktu (númeru telefone, email).

b. Númeru totál husi funsionáriu full-time ka part-time, no konsultór sira.

c. Informasaun jerál kona-ba misaun, espesialidade tékniku, abilidade sira iha linguajen, no servisu no programa atuál.

d. Area jeográfika sira iha Timor-Leste ne’ebé halo servisu ba no nia foka iha ne’ebé. Ida ne’e bele inklui ita nia servisu fatin ka edifísiu iha ne’ebé, no mós fatin hirak ne’ebé ita iha ona esperiénsia servisu ba.

2. Área espesialidade.

Favór fornese informasaun hirak tuir mai, se karik ida ne’e aplika ba ita nia esperiénsia organizasaun ka individu nian. Favór sente livre atu hakat liu (lalika responde ba) informasaun balun ne’ebé la aplika ba ita nia esperiénsia ka kapasidade.

a. Informasaun jerál kona-ba ita nia kapasidade sira iha kualkér area ka iha area haat sira ne’ebé temi espesífiku iha PBI ida ne’e: Analiza dadus kualitativu; produsaun materia aprendizajen sira; tradusaun, no kordenasaun iha lokál.

b. Projetu sira ne’ebé foin dadauk nee mak remata, rezultadu sira, no produsaun materiál sira ne’ebé disponivel ba públiku iha kualkér area ka area kapasidade sira, aponta fatin halo servisu nian, fundus husi ne’ebé, programa ne’e foka ba saida, no totál kuantidade.

c. Edukasaun espesializadu no treinamentu ne’ebé relevante iha kualkér area ka area kapasidade sira ne’e hotu.

d. Esperiensia fó treinamentu ba ema seluk iha kualkér area ka area kapasidade sira ne’e hotu.

e. Referensia profesionál husi ema sira ne’ebé superviziona ona ita-boot nia servisu iha kualkér area ka area kapasidade sira sira ne’e hotu.

Instrusaun ba Submisaun:

Favór manda ita nia submisaun iha Tetun ka Inglés ba iha EastTimor-DiliLocalWorks@usaid.gov no loron ikus liu ba submisaun mak 10 Jullu 2020 17:00 lokraik. Favór inklui informasaun tuir mai iha subject line husi ita nia email: Servisu Lokál PBI – Naran Husi Organizasaun ka Individu.

Avizu Legál:

Ida ne’e LA’OS solisitasaun/konvite ida. Pedidu ba Informasaun (PBI) ida ne’e hasai somente ho objetivu ba de’it informasaun no planu— ida ne’e la inklui Pedidu ba Proposta (PBP)/Notifika Kona-ba Oportunidade Fundus (NKOF) ka promesa ida atu fó-sai PBP/NKOF iha futuru.

USAID sei bele fó sai solisitasaun/konvite kompletu ida iha tempu balun tuir mai liu husi portal Guvernu U.S. iha https://beta.sam.gov/ ka www.grants.gov.

Interese sira hotu sei konsidera hanesan informasaun de’it. Responde sira ba PBI ida ne’e la’os nu’udar proposta ofisiál no sei la konsidera nu’udar forma ida atu iha koneksaun konkordánsia ho Governu U.S. no sei la interpreta hanesan komitmentu husi Governu U.S. atu fó-sai solisitasaun/konvite ida ka selu ba kualkér informasaun ne’ebé hatama ona tanba pedidu ida ne’e. Organizasaun sira ne’ebé responde ba pedidu ida ne’e mak responsabliza rasik ba gastu sira ne’ebé relasiona ho preparasaun no submisaun sira nia responde ba PBI ida ne’e. Ida ne’e responsabilidade husi respondente sira atu haree nafatin iha www.fbo.gov ka www.grants.gov kona-ba informasaun tuir mai ne’ebé sei fó-sai. Presija nota katak bainhira responde ona ba PBI ida ne’e, la signifika sei fó kualkér vantajen ba iha kualkér organizasaun iha kualkér aprovizionamentu tuir mai. Submisaun hotu ba pedidu ida ne’e tanke hatama ba iha EastTimorDili-LocalWorks@usaid.gov.